दोभान बजार आगलागी : आगो फैलिन नदिन घर भत्काइँदै

विराटनगर– ताप्लेजुङको मेरिङदेन गाउँपालिका–३ दोभान बजारमा आज बिहान ९ बजेदेखि सुरू भएको आगलागी अझै नियन्त्रणमा आउन सकेको छैन।

घटनास्थलमा दमकल पुगे पनि आगो निभाउन नसकेपछि आगो फैलन नदिन स्काभेटर लगाएर घर भत्काउन थालिएको छ।

मेरिङदेन गाउँपालिका–३ खाम्लुङमा बिहान करिब ९ बजेदेखि आगलागी सुरु भएको स्थानीय दिपेश कार्कीले जानकारी दिए।

स्थानीय व्यापारी भोलानाथ पौडेलको घरबाट आगलागी सुरू भएको हो। हालसम्म दोभान मनि ट्रान्सफर र ग्लोबल आइएमई बैंकसहित ४० ओटा घर पूर्णरुपमा जलेर नष्ट भइसकेको प्रहरीले जनाएको छ।

दोभान बजार सदरमुकाम फुङलिङपछिको दोस्रो ठूलो र व्यस्त बजार हो। बजारका  घर एकआपपसमा जोडिएका र काठका भएकाले पनि आगो नियन्त्रणमा समस्या भएको स्थानीयले बताएका छन्।