समाचार
1601530463.jpg

काठमाडौं– सरकारले मास्क नलगाई सार्वजनिक यातायातका साधनमा यात्रा गर्न निषेध गरेको छ। 

कोरोना भाइरस महामारीको जाखिम बढेपछि सरकारले यस्तो निर्णय गरेको हो। सरकारले वैशाख महिनाभर सार्वजनिक ठाउँमा भीडभाड नगर्न, मन्दिर, सांस्कृतिक स्थलहरुमा नियमित पूजाबाहेक अन्य गतिविधि नगर्न, होटल–रेस्टुरेन्टहरु बेलुकी ८ बजेपछि बन्द गर्न आग्रह गरेको छ।

यस्तै सभासम्मेलनमा रोक लगाएको छ भने खेलकुदका कार्यक्रममा पनि प्रतिबन्ध लगाएको छ। 

मन्त्रिपरिषद्को सोमबार बसेको बैठककाे निर्णय सुनाउँदै सरकारका प्रवक्ता एवम् सञ्चारमन्त्री पार्वत गुरुङले भने, ‘सार्वजनिक सवारीसाधनमा सिट क्षमताभन्दा यात्रु राख्न नपाइने, सवारीसाधनलाई दैनिक निःसंक्रमित गर्नुपर्ने, मास्क नलगाउनेलाई गाडीमा चढ्नै नदिने निर्णय भएको छ।’

उनका अनुसार मास्क नलगाई यात्रा गर्न खोजेमा बढीमा १० रुपैयाँ लिई मास्क उपलब्ध गराउन चालक तथा सहचालकलाई आग्रह गरिएको छ। 

यसैगरी लामो दुरीमा बीच बाटोमा थप यात्रु चढाउन नपाइने भएको छ भने आन्तरिक हवाई उडानमा पनि सबै यात्रुका लागि मास्क तथा स्यानिटाइज अनिवार्य व्यवस्था गर्न सरकारले निर्देशन दिएको छ।

प्रत्येक उडानपछि विमानलाई निःसंक्रमण गर्नुपर्ने मन्त्री गुरुङले बताए। यात्रु प्रतीक्षालयमा भीडभाड नगर्न, कार्यालय र पसलमा जाँदा पनि मास्क प्रयोग गर्न सरकारले निर्देशन दिएको छ।

प्रतिक्रिया दिनुहोस्