म्यानमार : एक महिनापछि देखिइन् सू ची, प्रदर्शन जारी

काठमाडौं– म्यानमारमा सत्तापलटपछि पहिलो पटक आङ सान सू ची आज सार्वजनिक रुपमा देखा परेकी छन्। उनी आफ्नो वकिलसँग देखिएकी हुन्।

ठिक एक महिनाअघि (फेब्रुअरी १ तारिख) सैनिक कू भएयता उनी नजरबन्दमा छिन्। उनलाई अज्ञात स्थलमा राखिएको बताइएको छ।

सू चीका वकिलका अनुसार उनलाई भिडियो लिंकको माध्यमबाट अदालतमा पेश गरिएको थियो। भिडियोमा उनी स्वस्थ देखिएकी छन्। 

म्यानमारमा कू भएपछि प्रदर्शनहरु भइरहेका छन्। हिजो (आइतबार) को प्रदर्शन निकै हिंसात्मक भएको छ। प्रहरीको गोली लागेर हिजो १८ जनाको मृत्यु भएको छ। कैयौं गम्भीर घाइते भएका छन्। 

बीबीसीका अनुसार आज सोमबार पनि म्यानमारको सडकमा बिहानैदेखि प्रदर्शनकारी देखा परेका छन्। उनीहरुले सू चीको रिहाइ र सरकार पुनर्स्थापनाको माग गरेका छन्।