काठमाडौं – इटालियन सिरी ए अन्तर्गत शनिबार राति सम्पन्न खेलमा साविक विजेता युभेन्टस् बराबरीमा रोकिएको छ।
वेरोनाको मैदानमा आतिथ्यता पाएको पाहुना टिम युभेन्टस १–१ गोलको बराबरीमा रोकिएको हो।
दुवै पक्षको खेल प्रतिस्पर्धात्मक देखिए पनि अवसरको सदुपयोग गर्न नसक्दा पहिलो हाफ गोलरहित बराबरी भएको थियो।
तर, दोस्रो हाफको ४९ औं मिनेटमा गोल गर्दै युभेन्टस्का स्ट्राइकर रोनाल्डोले खाता खोले। यससँगै पाहुना टिम एक गोलले अघि रह्यो।
त्यसपछि दबाबमा आएको वेरोनाका एन्टोनिन बरकले ७७ औं मिनेटमा गोल गरेपछि खेल पुनः बराबरीमा पुगेको थियो।
खेल अवधिभर युभेन्टस्ले १५ र वेरोनाले १३ सुट गरे पनि बाँकी सुटले पोस्टभित्रको गति लिन सकेनन्। यससँगै दुवै क्लबले समान १–१ अंक बाँडेका छन्।
गएरातिको बराबरीसँगै युभेन्टसलाई पुनः दुई अंक घाटा लागेको छ। ऊ शीर्षस्थानको इन्टर मिलानभन्दा सात अंकपछि पर्दै तेस्रो छ।
त्यस्तै अर्को टिम वेरोना नवौं स्थानमा छ। उसको ३५ अंक छ।