काठमाडौं- राष्ट्रपति विद्यादेवी भण्डारी र प्रधानमन्त्री केपी शर्मा ओलीबीच बिहीबार साँझ भेटवार्ता भएको छ। प्रधानमन्त्री ओली राष्ट्रपतिलाई भेट्न शीतलनिवास पुगेका थिए।
सुरक्षा स्रोतका अनुसार साँझ साढे सात बजे शीतलनिवास पुगेका ओली नौ बजेपछि बाहिरिएका थिए।
संसद् पुनः स्थापना गर्ने सर्वोच्च अदालतको आदेशपछि प्रधानमन्त्री ओली पहिलोपटक राष्ट्रपतिलाई भेट्न शीतलनिवास पुगेका हुन् ।
सर्वोच्चले संसद् विघटन बदर गर्दै १३ दिनभित्र संसद् अधिवेशन आह्वान गर्न मंगलबार आदेश दिएको थियो।
संसद् पुनः स्थापनापछि उत्पन्न राजनीतिक घटनाक्रमलाई लिएर छलफल गर्न प्रधानमन्त्री ओली राष्ट्रपति भण्डारीलाई भेट्न शीतलनिवास पुगेको बताइएको छ।