काठमाडौं– नेकपा ओली समूहका स्थायी कमिटी सदस्य किरण गुरुङले राजनीतिको बल अब पुष्पकमल दाहाल र माधवकुमार नेपालको कोर्टमा पुगेको बताएका छन्।
नेपाल समयसँग संक्षिप्त कुराकानी गर्दै उनले भने, ‘हिजोसम्म केपी ओलीको कोर्टमा बल थियो, अब माधव नेपाल र प्रचण्डको कोर्टमा पुगेको छ। उहाँहरुको काँधमा जिम्मेवारी आएको छ।’
सर्वोच्च अदालतको फैसलालाई मान्नुपर्ने र सम्मान पनि गर्नुपर्ने उनको भनाइ छ। ‘विमति त होलान् तर सर्वोच्चको फैसला मान्नैपर्छ। संसद् अधिवेशन डाक्नैपर्छ। संसद्बाटै निकास निकाल्नुपर्छ,’ उनले भने।
पार्टीभित्रको आन्तरिक झगडाका कारण यो विषय सडक र अदालतमा पुगेको भन्दै गुरुङले पार्टीभित्र बसेर नै निकास निकाल्नुपर्नेमा जोड दिए। नेकपा औपचारिक रुपमा नफुटिसकेकाले यसबारे पार्टीमै बहस गर्नुपर्ने उनले बताए।
प्रधानमन्त्रीमाथि नैतिकताको प्रश्न उठेको तर उनी नभाग्ने गुरुङले बताए। संसदीय मूल्य मान्यता अनुसार नै संसद् विघटन भएको तर्क उनले गरे। गुरुङ गण्डकी प्रदेशका आर्थिक मामिला मन्त्री हुन्।