काठमाडौं– सर्वोच्च अदालतले प्रतिनिधिसभा विघटन गर्ने प्रधानमन्त्री केपी ओलीको निर्णय बदर गरिदिएपछि नेकपा दाहाल–नेपाल समूहमा अहिले खुसियाली छाएको छ। शीर्षदेखि तल्लो तहका नेता–कार्यकर्ताले सर्वोच्चको आदेशको स्वागत गरेका छन्।
कतिपय ठाउँमा कार्यकर्ताले दीपावलीसमेत गरेका छन्।
दाहाल–नेपाल समूहले सर्वोच्चको फैसलालाई जनताको जित भनेको छ। चितवनमा रहेका अध्यक्षद्वय पुष्पकमल दाहाल र माधवकुमार नेपालले संवैधानिक इजलासले ऐतिहासिक र साहसिक फैसला गरेको प्रतिक्रिया दिएका छन्।
आफूहरुको पनि जित भएको भन्दै उनीहरुले लड्डु पनि खाएका छन्। दाहालले नेपाललाई र नेपालले दाहाललाई लड्डु खुवाइदिएको तस्बिर सामाजिक सञ्जालमा भाइरल भइरहेको छ।