काठमाडौं– नेपालमा चार लाख २८ हजार ९२४ जनाले कोरोना खोप लगाएका छन्।
स्वास्थ्य तथा जनसंख्या मन्त्रलायले मंगलबार दिएको जानकारीअनुसार सोमबारसम्म यी व्यक्तिलाई कोरोना भाइरसविरुद्धको खोप लगाइएको हो।
अग्रपंक्तिमा रहने सुरक्षाकर्मी, स्वास्थ्यकर्मी, चिकित्सक, जनप्रतिनिधि, पत्रकारलगायतलाई पहिलो चरणको खोप लगाइएको छ।
पहिलो चरणमा भारतबाट अनुदानमा प्राप्त १० लाख डोज खोप लगाइँदै छ भने फागुन २३ गतेदेखि शिक्षक, कर्मचारी तथा ५५ वर्षभन्दा माथिका व्यक्तिलाई कोरोना भाइरस विरुद्धको खोप लगाउने तयारी सरकारको छ।
दोस्रो चरणमा शिक्षक र सार्वजनिक यातायातका चालक र सहचालकले पनि कोरोना खोप लगाउन पाउने भएका छन्।
सरकारले भारतसँग खरिद गरेको १० लाख डोज खोप आइतबार काठमाडौं ल्याइएको छ।
विश्वविद्यलायका प्राध्यापक, शिक्षक तथा कर्मचारी, सार्वजनिक यातायातका चालक तथा सहचालकले फागुन २३ गतेदेखि कोरोना खोप लगाउन पाउनेछन्।
भारतले १० लाख डोज खोप अनुदानमा दिएपछि नेपालमा १४ माघदेखि कोरोना खोप अभियान सुरु भएको थियो।