काठमाडौं– आफ्ना सहयोद्धा, सामान्य नेता, पत्रकार, बुद्धिजीवी र वकिलसँग आक्रोश पोख्दै आएका प्रधानमन्त्री केपी ओली पछिल्लो समय संवैधानिक अंगका प्रमुखविरुद्ध खनिन थालेका छन्।
विराटनगरमा शनिबार आयोजित आमसभामा प्रधानमन्त्री ओलीले अदालतले संसद् पुनर्स्थापना गरे आन्दोलन चर्काउने चेतावनी दिएका दिए।
प्रतिनिधिसभा विघटनविरुद्ध परेको रिटमा सर्वोच्च अदालत फैसला सुनाउने चरणमा पुगेको छ। ओलीले आफूहरुको सभा र भीडलाई हेरेर अदालतले फैसला गर्नुपर्ने आसय पनि व्यक्त गरेका थिए।
ओलीले भनेका थिए, ‘कुनै जालझेल र सेटिङका आधारमा संसद् पुनर्स्थापनाको फैसला भए आन्दोलनको आधिबेहेरी आउनेछ।’ उनले फागुन १ गते बटुवलमा आयोजित सभामा संसद् पुनर्स्थापना हुनु भनेको लोकतन्त्रको हुर्मत लिनु हो भनेका थिए। उनको आसय अदालतले संसद् पुनर्स्थापना नगरोस् भन्ने थियो।
प्रजातन्त्र दिवसका अवसरमा शुक्रबार सैनिकमञ्च टुँडिखेलमा भएको कार्यक्रममा प्रधानमन्त्री ओलीले उपराष्ट्रपति नन्दबहादुर पुनसँग आक्रोश पोखेका थिए।
टुँडिखेलमा आयोजित समारोह सकिएपछि सबै अतिथि गण र सुरक्षाकर्मी उभिएर राष्ट्रपति भण्डारीको बिदाइ गरिरहेका थिए।
त्यही बेला प्रधानमन्त्री ओली उपराष्ट्रपति पुन उभिएको स्थानमा पुगेर संसद् विघटनको किन विरोध गरेको? भन्दै प्रश्न गरेको उपराष्ट्रपतिको सचिवालयका एक सदस्यले बताए। के गर्न खोज्नुभएको हो भन्दै ओलीले आक्रोश पोखेका थिए।
सचिवालयका अनुसार संसद् विघटनको विरोधमा उपराष्ट्रपतिले सार्वजनिक अभिव्यक्ति दिएकोमा प्रधानमन्त्रीको आक्रोश थियो।
उपराष्ट्रपति पुनले ओलीलाई जबाफ फर्काएका थिए, ‘तपाईंले असंवैधानिक कदम र गतिविधि गर्ने, मैले संविधान र जनताको अधिकारको कुरा गर्न किन नहुने?’
प्रधानमन्त्री र उपराष्ट्रपतिबीच मनमुटाव भएको भिडियो दृश्यबाट पनि बुझ्न सकिन्छ। उपराष्ट्रपति पुन सबैलाई नमस्कार गर्दै बाहिरिन्छन् । तर प्रधानमन्त्रीले अभिवादन नफर्काएको भिडियोमा देखिन्छ। बरु उनी उपराष्ट्रपतिलाई हेरिरहन्छन्।
त्यसो त उपराष्ट्रपतिविरुद्ध प्रधानमन्त्रीले सार्वजनिक कार्यक्रममा पनि आलोचना गरेका छन्। प्रधानमन्त्री ओलीले शनिबार विराटनगरमा आयोजित सभामा सम्बोधन गर्दै उपराष्ट्रपतिविरुद्ध आक्रोश पोखे।
पदीय हैसियत बिर्सेर सरकारको विरोध गरेको भन्दै उनले उपराष्ट्रपतिलाई सच्चिन अपिल गरेका थिए। ओलीले उपराष्ट्रपतिलाई सम्बोधन गर्दै भनेका थिए, ‘सरकारको कदमको विरोध गर्ने र चुनाव गर्न हुन्न भन्दै हिँड्ने काम बन्द गर्नुहोस्।’
उपराष्ट्रपति पुनले फागुन ५ गते एक कार्यक्रममा संसद् विघटन गर्ने प्रधानमन्त्री ओलीको कदमले देशमा राजनीतिक संकट गहिरिएको भन्दै असन्तुष्टि पोखेका थिए।
उपराष्ट्रपति पुनले संसद् विघटनपछि पहिलोपटक सार्वजनिक कार्यक्रममा ओलीको कदमका कारण मुलुक अप्ठेरो परिस्थितिमा पुगेको टिप्पणी गरेका थिए।
उनले भनेका थिए, ‘नयाँ संविधान कार्यान्वयनको प्रारम्भिक चरणमै संविधानमाथि प्रहार गरियो, देशलाई भुमरीमा पारियो भनी प्रश्न उठ्ने गरी परिस्थितिको सिर्जना हुनु ज्यादै दुःखद हो।’
उपराष्ट्रपतिसँग मात्रै होइन प्रधानमन्त्री ओलीले सभामुख अग्निप्रसाद सापकोटालाई पनि झगडिया भन्दै गाली गर्न थालेका छन्। शनिबार विराटनगरमा आयोजित कार्यक्रममा किर्ते सनाखत गरेर झगडियाको काम गरेको भन्दै सभामुख सापकोटाप्रति आक्रोश पोखेका थिए।
उनले भनेका थिए, ‘सरकारविरोधी झगडिया हो सभामुख? सभामुखले झगडिया हुन सुहाउँछ? सभामुख चुनेको झगडिया हुनका लागि हो? तर, उहाँ झगडिया हुन जानुभएको छ।’
आफू कमजोर हुँदै गएपछि प्रधामन्त्री ओलीले एकपछि अर्को गर्दै सबै संस्था र व्यक्तिलाई धम्क्याउन सुरु गरेको विश्लेषक गोपीरमण उपाध्याय बताउँछन्।
‘शासक कमजोर भएपछि ठूलो स्वरले बोल्ने, अरूलाई तर्साउन खोज्ने गर्छन्। प्रधानमन्त्रीज्यू यही गरिरहनुभएको छ’, उनले भने।
विगत दुई महिनादेखि कार्यकारी प्रमुख ओली आक्रोशको शृंखला रोकिएको छैन। उनले सम्बोधन गर्ने हरेका सार्वजनिक कार्यक्रममा कोही न कोही निसानामा पर्ने गरेका छन्।
पुस १७ मा राजधानीमा आयोजित एक कार्यक्रममा उनले पूर्वसहकर्मी पुष्पकमल दाहालविरुद्ध भनेका थिए, तीन वर्षमा डोभ साबुनका धेरै डल्ला, स्याम्पु, साबुन, ड्रमका ड्रम, ट्यांकीका ट्यांकी पानी सकियो, प्रचण्डलाई धुँदाधुँदा। साबुन लगायो, पखाल्यो जस्ताको तस्तै। अन्तिममा तपाईंहरूले देखिहाल्नुभयो।'
यस्तै ओलीले झन्डै चार दशकसँगैदेखि एउटै मोर्चामा रहेर काम गर्दै आएका माधवकुमार नेपाललाई पनि तुच्छ शब्द प्रयोग गरेका छन्।
पुस १५ गते राजधानीमा आयोजित कार्यक्रममा उनले भनेका थिए, ‘माधव नेपालजीको सम्बन्धमा त मलाई खास टिप्पणी नै गर्नुपर्ने छैन। किनकि उहाँ प्रचण्डको एउटा मामुली कार्यकर्ता हो। उहाँ कार्यकर्ता हुन जानुभएको छ।’
ओलीले माधव नेपालको बोल्ने शैलीको नक्कल गर्दै भनेका थिए, ‘मलाई पदको लोभ छैन। म अरूजस्तो पदलोलुप होइन। तर मलाई उधारो हुँदैन। नगद चाहिन्छ। उधारो म पत्याउँदिनँ। हाताहाती चाहिन्छ। नगद के रहेछ भनेको त द्वितीय अध्यक्ष।’
मान्छे भड्काउनका लागि झुटा समाचार प्रायोजित ढंगले छापिरहेको भन्दै उनले सञ्चारमाध्यमको पनि आलोचना गरेका छन्।