बुटवल– बुटवलको शिरमा रहेका दुई डाँडामा केबलकार आयोजना सुरु भएको छ।
निजी लगानीमा सुरु भएका यी दुवै केबलकार आयोजनामा प्रधानमन्त्री केपी शर्मा ओली र अर्थमन्त्री विष्णुप्रसाद पौडेलले महत्त्व दिएका छन्।
फागुन १ गते प्रधानमन्त्री ओलीले बुटवलदेखि पाल्पा वसन्तपुरमा चल्ने लुम्बिनी केबलकार आयोजनाको शिलान्यास गरेका थिए।
चन्द्रागिरी केबलकार सञ्चालन गरेका चन्द्र ढकाल र बुटवलका केही व्यवसायी मिलेर बुटवलदेखि वसन्तपुर चल्ने लुम्बिनी केबलकार आयोजना अघि बढाएका हुन्। बुटवलदेखि पाल्पाकै नुवाकोटमा भने बुटवलका व्यवसायीको लगानी छ।
सिद्धार्थ केबलकार प्रालीको आइतबार अर्थमन्त्री पौडेलले उद्घाटन गरे। पौडेलले बुटवलको विकासमा यस्ता आयोजनाले पर्यटन क्षेत्रमा ठूलो योगदान गर्ने बताए।
प्रधानमन्त्री ओलीले शिल्यान्यास गरेको लुम्बिनी केबलकारको कुल लागत तीन अर्ब ५० करोड अनुमान गरिएको छ। लुम्बिनी केबलकारको लम्बाइ तीन किलो मिटरको छ।
बुटवल उपमहानगरपालिका–३ को चुरे सामुदायिक वनसमेतको ३.१६ हेक्टर र पाल्पाको तिनाउ गाउँपालिका–३ को चिउरीडाँडा न्याउली सामुदायिक वनसमेतको ३.११ हेक्टर वन क्षेत्र २५ वर्षसम्म प्रालिलाई भोगचलान गर्न मन्त्रिपरिषद् बैठकले स्वीकृति दिएपछि निर्माण सुुरु भएको हो।
ऐतिहासिक तथा धार्मिक स्थल नुवाकोट गढीमा सिद्धार्थ केबलकार प्रालिले केबलकार सञ्चालन प्रक्रिया अघि बढाएको हो।
प्रालिले यसअघि नै सरकारबाट बन क्षेत्र उपयोग गर्ने स्वीकृति लिएर केही काम अगाडि बढाइसकेको छ।
अबको १८ महिनाभित्र केबलकार सञ्चालनमा ल्याउने योजना रहेको सिद्धार्थ केबलकार प्रालिका अध्यक्ष राजेन्द्रसिंह गुरुङले जानकारी दिए। केबलकार दुई किलोमिटर लम्बाइको हुनेछ।
सिद्धार्थ केबलकार प्रालिले २०६८ सालमा केबलकार निर्माणको अभियान अगाडि बढाएको थियो। केबलकार सञ्चालनका लागि २०७५ साल साउनमा ३.९८ हेक्टर र २०७६ फागुनमा २.११८ हेक्टर बन क्षेत्र ३० वर्षको लागि प्रालिलाई भोगचलन गर्न मन्त्रिपरिषद् बैठकले स्वीकृति दिएको थियो।
निर्माणपछि केबलकारमा २५ वटा डब्बा रहने र बुटवलको देउराली डाँडाबाट नुवाकोट आठ मिनेटमा पुग्न सकिने अध्यक्ष गुरुङले जानकारी दिए। सञ्चालनमा आएपछि दैनिक पर्यटकले केबलकारको उपयोग गर्ने प्रालिको अपेक्षा छ।