बुटवल- राष्ट्रिय जनमोर्चाका अध्यक्ष चित्रबहादुर केसीले प्रधानमन्त्रीलाई २०७२ को संविधानले संसद विघटनको अधिकार नदिएको बताएका छन्।
उनले २०४७ को संविधानले प्रतिनिधिसभा विघटन गर्न प्रधानमन्त्रीलाई अधिकार दिए पनि २०७२ को संविधानले यस्तो अधिकार नदिएको बताए।
‘ओलीको कदम निरंकुश र अलोकतान्त्रिक छ’ शनिबारदेखि बुटवलमा शुरु भएको जातिय समता समाजको चौथौ राष्ट्रिय सम्मेलनलाई सम्बोधन गर्दै उनले भने।
उनले सरकारलाई काम गर्न नदिएको नाममा प्रतिनिधिसभा विघटन गर्ने अधिकार ओलीलाई नभएको बताए।
‘ओलीलाई अर्को कुन शक्तिले दियो संसद विघटन गर्ने अधिकार’ उनले प्रश्न गरे। संसद पुनर्स्थापना हुनेनहुने निश्चित नभएको उल्लेख गर्दै उनले अदालत र निर्वाचन आयोग सरकारको दबाबमा परेको बताए। प्रधानमन्त्री ओली र कांगे्रस सभापति शेरबहादुर देउवा लेनदेन र भ्रष्टाचारमा सँगसँगै भएकाले देउवाले चुनावको पक्षमा अभिमत दिएको बताए।
नेपालको लागि संघीयता घाँडो भएको बताउदै प्रदेश संरचना खारेज गरेर स्थानीय तहलाई अधिकार सम्पन्न नगराएसम्म देशले निकास पाउन नसक्ने दाबी उनले गरे।
संघीयता र प्रतिनिधिसभा विघटनले देश झनै संकटमा परेको अध्यक्ष केसीको भनाइ छ। दुई दिनसम्म चल्ने सम्मेलनले नयाँ नेतृत्व चयन गर्ने छ।