काठमाडौं - झण्डै ३१ लाख नगदसहित ललितपुरबाट १७ जना जुवाडे पक्राउ परेका छन्।
महानगरीय प्रहरी परिसर ललितपुरबाट खटिएको टोलीले शुक्रबार साँझ साढे ५ बजे ललितपुर महानगरपालिका-२६, सुनाकोठीबाट उनीहरूलाई पक्राउ गरेको हो।
उनीहरूको साथबाट ३० लाख ८४ हजार ४०० नगद, १९ बुक तास, १६ थान कौडा, तास खेल्दा प्रयोग हुने ५ थान क्यारेम कोटी र १५० थान सिमीका दाना बरामद् गरिएको प्रहरीले जनाएको छ।
प्रहरीका अनुसार जुवाडेहरू सुनाकोठीस्थित अजय महर्जनको चारतले घरको दोस्रो तलामा जुवातास खेलिरहेका थिए। उनीहरूलाई पक्राउ गर्न ३५ जनाको प्रहरी टोली खटिएको थियो।
पक्राउ पर्नेमा ललितपुरका रामबहादुर लामा, प्रकाश भण्डारी, लवकुमार बस्नेत, राकेश महर्जन, दिनेश पुडासैनी, हिटलर श्रेष्ठ, अनिल महर्जन, श्रीकृष्ण खड्का, तुलसीराम महर्जन छन्।
त्यस्तै ललितपुरकै सानुकान्छा महर्जन, पूर्ण श्रेष्ठ, विनोदप्रसाद घिमिरे, पूर्णमान माली, सानुकान्छा बस्नेत, राम खत्री, विनोद महर्जन र चिरीकाजी महर्जन रहेको प्रहरीको भनाइ छ।