संवैधानिक इजलासमा बहस सकियो, बहस नोटका लागि तीन दिनको समय

काठमाडौं– प्रतिनिधि सभा विघटनसम्बन्धी सर्वोच्च अदालतमा दायर मुद्दाको बहस सकिएको छ। शुक्रबार एमिकस क्युरी गीता पाठकले राय दिएपछि बहस सकिएको हो।

संवैधानिक इजलासको नेतृत्व गरिरहेका प्रधानन्यायाधीश चोलेन्द्रशमशेर जबराले बहस सकिएपछि यही फागुन १० गतेभित्र बहस नोट दिन आग्रह गरेका छन्। उनले रिटमा पक्ष, विपक्ष र एमिकस क्युरीका रुपमा चयन भएका कानुन व्यवसायीलाई बहस नोट पेश गरिसक्न भनेका हुन्।

बहस नोट पेश भएपछि मुद्दा हेर्दाहेर्दैमा जाने र निर्णय आउन केही समय लाग्ने बताइएको छ।

आज एमिकस क्युरीका तर्फबाट अन्तिम बहस गरेकी वरिष्ठ अधिवक्ता गीता पाठकले संसद् विघटन संविधान विपरीत भएको जिकिर गरिन्।

प्रधानमन्त्री केपी ओलीले गत पुस ५ गते प्रतिनिधिसभा विघटन गरेर मध्यावधि निर्वाचन घोषणा गरेपछि त्यसविरुद्ध सर्वोच्च अदालतमा एक दर्जनभन्दा बढी रिट परेका छन्।