काठमाडौं - केन्द्रीय कमिटी सदस्यहरूलाई नागरिकताको सक्कलसहित पार्टी कार्यालयमा भेला हुन निर्देशन दिएको नेकपाको दाहाल–नेपाल पक्षको त्यसअघि अनौपचारिक स्थायी कमिटी बैठक बस्दै छ।
कार्यालय सचिव श्रीराम ढकालले अहिले केहीबेरपछि स्थायी कमिटी सदस्यहरूको अनौपचारिक बैठक बस्न लागेको जानकारी दिए।
प्रतिनिधिसभा विघटनविरुद्ध चरणबद्ध आन्दोलनमा रहेको नेकपाको दाहाल–नेपाल समूहले केन्द्रीय कमिटीका सदस्यहरूलाई आकस्मिकरूपमा केन्द्रीय कार्यालयमा १२ बजे भेला हुन निर्देशन दिएको छ।
त्यसअघि स्थायी कमिटीका सदस्यहरू अनौपचारिकरूपमा छलफल गर्न लागेका हुन्।
सक्कल नागरिकतासहित आउन निर्देशन भएकाले दाहाल–नेपाल पक्षीय नेताहरू निर्वाचन आयोग जानसक्ने बताइएको छ।
पुस ५ मा प्रतिनिधिसभाको विघटन भएपछि नेकपा राजनीतिकरूपमा विभाजित बनेको छ।
नेकपाको आधिकारिकताका सम्बन्धमा अहिलेसम्म टुंगो लागेको छैन। निर्वाचन आयोगले माघ ११ गते दुवै पक्षले बुझाएको विवरणलाई अद्यावधिक गर्न नसकिने निर्णय गरिसकेको छ।