निजी अस्पतलाको ओपीडी शुल्क ४० प्रतिशतसम्म बढ्यो

काठमाडौ- आज (बुधबार) देखि निजी अस्पतालको ओपीडी शुल्क बढेको छ।

नेपाल चिकित्सक संघ (एनएमए) र निजी अस्पताल सञ्चालकहरुको संस्था एसोसिएन अफ प्राइभेट हेल्थ इन्स्टिचयुसन नेपाल (अफिन) ले सूचना जारी गर्दै चिकित्सकहरुको ओपीडी शुल्क बढाएको छ।

नयाँ शुल्कअनुसार न्यूनतम ३७० देखि अधिकतम ८२५ रुपैयाँ तोकिएको छ। त्यसमा नर्सिङ होम तथा अस्पतालहरुले थप २० प्रतिशत चार्जसमेत जोड्न पाउने गरी निर्णय गरेको छ। 

नयाँ निर्णयअनुसार डिएम एमसीएच गरेको र पाँच वर्ष अनुभव प्राप्त चिकित्सक वा एमडीएमएस, एमडीएस गरेको १० वर्ष अनुभव प्राप्त चिकित्सकलाई ८२५ रुपैयाँ ओपिडी शुल्क तोकिएको छ। एमबीबीएस वा बिडीएस गरी पाँच वर्ष अनुभव नपुगेको चिकित्सकको ओपीडी शुल्क ३७० रुपैयाँ तोकिएको छ।

नेपाल चिकित्सक संघका अध्यक्ष लोचन कार्कीले नेपाल समयसँग भने, ‘शुल्क बढाउने विषयमा स्वास्थ्य तथा जनसंख्या मन्त्रालयसँग सहमति नभएपछि एनएमए र अफिनले एकतर्फी रुपमा शुल्क बढाएका हौँ।’ 

२०७१ असोज १ देखि लागू भएको ओपिडी शुल्क दुई–दुई वर्षमा समायोजन गर्नुपर्ने भए पनि त्यो अहिलेसम्म समायोजन भएको थिएन। डा. कार्कीका अनुसार स्वास्थ्य स्वास्थ्यमा क्रियाशील ट्रेड युनियन तथा पेशागत संघ संगठनहरुले स्वास्थ्य तथा मन्त्रालयमा माघ ४ गते भएको सम्झौतामा ३० दिनभित्र शुल्क समायोजन गर्ने निर्णय भएको थियो।

तर त्यसको कार्यान्वयन नभएपछि आँफैले बाध्य भएर शुल्क बढाएको जनाएको छ। कार्कीका अनुसार निजी अस्पतालको ओपीडी शुल्कमा ३५–४० प्रतिशतसम्म शुल्क बढेको छ।