भागरथी हत्याका आरोपितको बयान- घरायसी रिसइबीका कारण बलात्कारपछि हत्या गरेँ

बैतडी - बैतडीकी १७ वर्षीया भागरथी भट्टको हत्या आरोपमा पक्राउ परेका किशोरले घरायसी रिसइबीका कारण बलात्कारपछि घाँटी थिचेर हत्या गरेको बयान दिएका छन्। 

भागरथी अध्ययनरत दोगडाकेदारकै सनातन धर्म माध्यमिक विद्यालयमै कक्षा ११ पढ्ने १७ वर्षकै भट्ट थरका आरोपित किशाेरले प्रहरीलाई बयान दिने क्रममा भनेका छन्- 'भागरथी र मेरो परिवारबीच पहिलेदेखि घरायसी रिसइबी थियो, सोही कारण मैले उनको बलात्कारपछि घाँटी थिचेर हत्या गरेको हुँ।'

प्रहरी स्रोतका अनुसार उनले भागरथीको हत्या गर्ने एकल योजनामा आफू पहिल्यैदेखि रहेको र उचित मौकाको पर्खाइमा बसेको समेत बताएका छन्। 

भागरथीका छिमेकीसमेत रहेका ती आरोपितलाई अहिले जिल्ला प्रहरी कार्यालयको हिरासतमा राखिएको प्रहरी स्रोतले बताएको छ। 

उनलाई मंगलबार राति खोचलेक प्रहरी चौकीबाट जिल्ला लगिएकाे थियाे। 

बुधबार पत्रकार सम्मेलन आयोजना गरी आरोपितलाई सार्वजनिक गर्ने प्रहरीले जनाएको छ।

गत माघ २२ गते विद्यालयबाट घर फर्कने क्रममा बेपत्ता भएकी भागरथीको शव भोलिपल्ट हत्या गरेको अवस्थामा स्थानीय लवलेक सामुदायिक वनमा फेला परेको थियो।