काठमाडौं– प्रधानमन्त्री केपी शर्मा ओलीले भुटानी शरणार्थीका समस्या समय किटान गरेरै टुंग्याउनुपर्नेमा जोड दिएका छन्।
शरणार्थीका लागि राष्ट्रसंघीय उच्चायुक्तको कार्यालयको नेपालस्थित प्रतिनिधिमण्डलले मंगलबार गरेको भेटमा उनले यस्तो बताएका हुन्।
प्रधानमन्त्री निवास बालुवाटारमा भएको भेटमा उच्चायुक्तको कार्यालयकी नेपालस्थित प्रतिनिधि क्यारोलिन स्पानुथवर्माले भुटानी शरणार्थीको व्यवस्थापनबारे चासो राखेकी थिइन्।
प्रधानमन्त्री ओलीले हालसम्म भुटानी शरणार्थीको यथोचित प्रबन्धका लागि शरणार्थीका लागि राष्ट्र संघीय उच्चायोगबाट प्राप्त सहयोगका लागि धन्यवाद प्रकट गर्दै बाँकी शरणार्थीको व्यवस्थापनका लागि पनि पूर्ववत् सहयोग रहने विश्वास व्यक्त गरे।