ताप्लेजुङको मालपोत र नापी कार्यालय उद्घाटन काठमाडौंबाटै

विराटनगर– भूमि व्यवस्था, सहकारी तथा गरिबी निवारण मन्त्री डा. शिवमाया तुम्बाहाङ्फेले ताप्लेजुङमा नवनिर्मित मालपोत र नापी कार्यालयको मंगलबार काठमाडौंबाटै उद्घाटन गरेकी छन्।

मौसमका कारण सदरमुकाम फुङलिङमा उडान नभएपछि मन्त्रालयबाटै भर्चुअल माध्यमबाट मन्त्री तुम्बाहाङ्फेले मालपोत र नापी कार्यालय उद्घाटन गरेकी हुन्। 

कार्यक्रममा मन्त्री तुम्बाहाङ्फेले सरकारले मालपोत, नापीजस्ता कार्यालयलाई व्यवस्थित गर्दै सेवाग्राहीलाई सहज बनाउँदै लैजाने बताइन्। मन्त्री तुम्बाहाङ्फेले केन्द्रमा भूमि सम्बन्धी समस्या समाधान आयोग र जिल्लामा ७७ जिल्ला समिति गठन भएको बताउँदै स्थानीय तहसँग मिलेर काम गर्न आग्रह गरिन्। 

आयोगको काममा जनप्रतिनिधिसमेत जोडिएकाले ऐनअनुसार जिम्मेवार भएर काम गर्न उनको आग्रह छ।