खेलकुद

श्रीलंका पुलिसको फिटनेस नहुँदा त्रिभुवन आर्मीलाई फाइदा

1617846656.jpg

काठमाडौं- त्रिभुवन आर्मी क्लबका प्रशिक्षक नवीन न्यौपानेले श्रीलंका पुलिसको फिटनेस राम्रो नभएपछि आफ्नो टिमलाई फाइदा भएको बताएका छन्। त्रिभुवन आर्मीले श्रीलंका पुलिसविरुद्ध ५-१ गोलको जित निकालेपछि प्रशिक्षक न्यौपानेले यस्तो प्रतिक्रिया दिएका हुन्। 

NLG Insurance
Sampoorna Oil

‘हामीलाई फिटनेसको समस्या थिएन। तर श्रीलंकन पुलिसको फिटनेस कम रहेछ। त्यो हामीलाई फाइदा भएको थियो,’ उनले आर्मीको जितको कारण खुलाए। 

आर्मीले किर्गिस्तानविरुद्धको खेलमा गोल गर्न सकेको थिएन। यसकारण पछिल्लो अभ्यासमा फिनिसिङको राम्रो अभ्यास गरे पनि ऊ धेरै पटक फिनिसिङमा चुकेको थियो।

पहिलो हाफमै केही महत्त्वपूर्ण अवसर गुमाएको आर्मीले २८ मिनेटमा गोलको सामना गरेको थियो। यसको फाइदा पाहुना टिमले उठाउन खोजेको थियो, तर सफल हुन सकेन।

श्रीलंका पुलिसका प्रशिक्षक रोहन अल्फेन्सूले भने अन्तर्राष्ट्रिय अनुभव नभएका खेलाडीका कारण आफूहरूलाई गाह्रो भएको बताए। ‘हामीले पहिलो गोलको फाइदा लिएका थियौँ। तर हाम्रो डिफेन्सलाइन अन्तराष्ट्रिय खेलमा अनुभव नभएका खेलाडी थिए। त्यसैले उनीहरुलाई गाह्रो भएको जस्तो लाग्यो,’ उनले भने। 

प्रशिक्षक अल्फेन्सूले आफ्नो टिममा राष्ट्रिय टिमका खेलाडी नभएको र नेपाली टिममा राष्ट्रिय टोलीका खेलाडी हुनु नै हारको कारण भएको बताए। तर पनि आफ्ना खेलाडीले राम्रो खेलेको उनको धारणा छ। ‘यो खेलदेखि म सन्तुष्ट छु। नेपाली टिमले राम्रो खेल्यो,’ उनले भने, ‘मार्जिन(५–१ गोल) निकै भए पनि हाम्रा खेलाडीको अनुभवको आधारमा यो निकै राम्रो हो। तर स्कोरचाहिँ सन्तोषजनक भएन। नेपाल आर्मीको टिमले पोसेसन राखेर खेल्यो। विंग्स र ब्याकपास धेरै राम्रो लाग्यो। उसको टिम गेम प्राविधिक रुपले बलियो देखिन्थ्यो।’

यता आर्मीका प्रशिक्षक न्यौपानेले आफूले बनाएकै जस्तो रणनीतिमा खेलाडीले खेलेको बताए। जितको भोकलाई परिभाषित गर्दै भने, ‘थ्री नेसन्स कपमा घरेलु भूमिको खेलबाट नेपाललले जुन खुसी महसुस गरेको थियो आज त्यहि दिन मन थियो। सक्यौँ। निकै खुसी लागेको छ। खेलाडीले चाहेअनुसारकै प्रदर्शन गरेका छन्। कोभिडका कारण मनोबलमा कमी आउन सक्ने अवस्था थियो। तर त्यस्तो भएन।’

आर्मीले राष्ट्रिय टिमका अनुभवी गोलकिपर बिकेश कुथूको ठाउँमा युवा गोलकिपर विश्वास चौधरी प्रयोग गरेको थियो। कुथु राष्ट्रिय टिममा भएकाले आर्मीको सेटसँग मिल्ने गोलकिपर प्रयोग गरेको प्रशिक्षक न्यौपाने बताउँछन्। उनले भने, ‘विश्वासले कीर्गिस्तानविरुद्ध पनि क्लिन सिट राख्न सफल भएकाले उनलाई प्रयोग गरेका थियौँ।’

अब आर्मीले आउँदो अप्रिल १४ तारिकमा इन्डियन टिम बंगलोरसँग उसकै मैदानमा खेल्नेछ। ‘अबको खेल बैंगलोरसँग छ। यो खेलमा हाम्रो लक्ष्य पछिल्लो खेलमा गरेका गल्ती नदोहोर्‍याउने रहने छ। हामी बेस्ट दिनेछौं। तर कोभिड लागेका खेलाडीको अभाव चाहिँ हामीमाझ रहने नै छ,’ न्यौपानेले भने।

आर्मीका दुई खेलाडी र एक मेडिकल स्टाफलाई कोभिड–१९ को संक्रमण देखिएपछि उनीहरू आर्मी अस्पतालको आइसोलेसनमा छन्।

 

प्रतिक्रिया दिनुहोस्