सपनालाई धम्क्याउने बस्नेत पक्राउ

काठमाडौं– बीबीसीको प्रभावशाली महिला सूचीमा परेकी सपना रोका मगरलाई धम्क्याएको र दुर्व्यवहार गरेको अभियोगमा प्रहरीले विनयजंग बस्नेतलाई पक्राउ गरेको छ।

महानगरीय प्रहरी परिसर काठमाडौंको टोलीले उनलाई गोंगबुस्थित नयाँबसपार्क क्षेत्रबाट पक्राउ गरेको एसएसपी अशोक सिंहले जानकारी दिए।

उनलाई भोलि बुधबार अदालतबाट म्याद थपेर आवश्यक अनुसन्धान अघि बढाइने प्रहरीले जनाएको छ। 

बस्नेतविरूद्ध आइतबार अभद्र व्यवहारको मुद्दामा महानगरीय प्रहरी परिसर काठमाडौंमा जाहेरी दर्ता भएको थियो। बस्नेतले सपना रोका मगरको नग्न तस्बिर आफूसँग रहेको दाबी गर्दै ती तस्बिर सार्वजनिक गरिदिने धम्की दिएका थिए।