कोरोनाका थप दुई खोपलाई डब्लुएचओको मान्यता

काठमाडौं– विश्व स्वास्थ्य संगठन (डब्लुएचओ) ले थप दुईवटा खोपलाई आपतकालीन प्रयोगका लागि मान्यता दिएको छ। 

कोरियाले उत्पादन गरेको एस्ट्राजेनेका–एसके बायो खोप र भारतको सिरम इन्स्टिच्युटले उत्पादन गरेको कोभिसिल्ड खोपलाई डब्लुएचओले मान्यता दिएको हो। हाल मान्यता दिएका ती खोप कोभ्याक्समार्फत् विश्वभर पुर्‍याउने डब्लुएचओले जनाएको छ। 

डब्लुएचओकी सहायक निर्देशक मारिएन्जेला सिमाओले यी दुई खोपलाई आपतकालीन प्रयोगको मान्यता दिएसँगै पहुँच नपुगेका मुलुकका स्वास्थ्यकर्मी तथा उच्च जोखिममा भएका व्यक्तिले खोप लगाउन पाउने बताइन्।

हाल अक्सफोर्ड–एस्ट्राजेनेकाले विकास गरेको खोप नेपाललगायत विभिन्न १४ मुलुकमा आपतकालीन प्रयोग भइरहेको छ।

यसअघि फाइजरको खोपले डब्लुएचओबाट मान्यता पाएको थियो।