काठमाडौं- आयुषमान घले प्रथम जुनियर प्रिमियम टेनिस प्रतियोगिताको यू–१६ ब्वाइज सिंगल्समा क्वार्टरफाइनलमा प्रवेश गरेका छन्।
धापासीस्थित टिम टेनिस नेपालको कोर्टमा सोमबार सम्पन्न खेलमा आयुषमानले श्रेयस पौडेललाई ६–२ र ६–१ को सोझो सेटमा पराजित गरे।
यू–१ स्पर्धाको गर्ल्समा शुभाङ्गीलक्ष्मी शाहले प्रशंसा मोक्तानलाई ६–१ र ६–२ को सेटमा हराइन् भने निमिशा ढकालले अजा रेग्मीलाई ६–१ र ६–४ सेटमा हराउँदै क्वार्टरफाइनलमा पुगिन्।
त्यस्तै, सर्वानी श्रेष्ठले आइशा गुरुङलाई ६–३ र ६–२ तथा आद्या पौडेलले इभा अधिकारीलाई ६–२ र ६–४ को सीधा सेटमा हराउदै क्वार्टरफाइनलमा पुगेका छन्।
यु–१४ गर्ल्स सिंगल्समा प्रशंसा मोक्तानले कृषा अधिकारीलाई ६–२ र ६–३, इभा अधिकारीले समृद्धि महर्जनलाई ५–७, ६–२ र ७–५ र सुनिरा थापाले शैभी ढकाललाई ६–१ र ६–० ले पराजित गरे।
त्यस्तै जेनी खड्काले आद्या पौडेललाई ६–३ र ६–१ को सेटमा पाखा लगाउँदै सेमिफाइनलमा स्थान सुरक्षित गरिन्।
यू–१२ ब्वाइज सिंगल्समा अविर श्रीवास्तवले योगेश ज्ञवालीलाई ६–२ र ६–३ ले पन्छ्याउदै क्वार्टरफाइनलमा स्थान बनाए।
हिजोबाट सुरु भएको प्रतियोगिता आगामी फागुन ७ गतेसम्म चल्नेछ।