संसद् पुनःस्थापना हुनेमा ढुक्क छु : डा. कोइराला

काठमाडौं– नेपाली कांग्रेसका नेता डा. शेखर कोइरालाले अदालतबाट संसद् पुनःस्थापना हुनेमा आफू विश्वस्त रहेको बताएका छन्।

प्रतिनिधिसभा विघटनविरुद्ध सुनसरीमा आयोजित विरोधसभामा नेता कोइरालाले संविधान हेरेर फैसला गर्दा पुनःस्थापना भन्दा अर्को विकल्प नरहेको बताएका हुन्। 

कोइरालाले राष्ट्रपतिको भूमिका संविधानको संरक्षकको रुपमा हुनुपर्नेमा त्यस्तो नभएको बताए। सरकारले राज्यको ढुकुटी खर्च गरेर विरोधसभा गरिरहेको भन्दै उनले आपत्ति जनाए।

नारायणहिटी दरबारलाई पिठ्युँ देखाएर ओलीले ‘मैले जे बोल्छु त्यही कानुन हो भनेर देखाउन खोजेको’ उनको भनाइ थियो। साइबर सेना लगाएर नागरिकलाई तर्साउने र धम्क्याउने प्रयास ओलीले गरिरहेको उनले बताए।