काठमाडौं- नेपाल प्राध्यापक संघले कोभिड –१९ विरुद्धको खोप प्राध्यापकलाई पनि प्राथमिकतामा राखेर लगाउन सरकारको ध्यानाकर्षण गराएको छ।
आइतबार विज्ञप्ति जारी गर्दै संघले कोरोना महामारीबाट प्रभावित शैक्षिक क्षेत्र र यसमा आबद्ध प्राध्यापक, शिक्षक र कर्मचारीलाई खोप लगाएर शिक्षण संस्थामा हुने सम्भावित जोखिम कम गर्न सरकारको ध्यानाकर्षण गराएको हो।
प्राथकिता पहिचान गरी शिक्षण संस्था जस्तो संवेदनशील ठाउँमा खोप कार्यक्रम सञ्चालन गर्नुपर्ने संघले जनाएको छ।
नेपालमा खोप कार्यक्रम सञ्चालन भइरहको अवस्थामा प्राध्यपक, शिक्षक र कर्मचारीलाई अहिलेसम्म पनि सूचीमा नराखेको प्रति संघले खेद प्रकट गरेको छ।
संघले शिक्षा, स्वास्थ्य, सुरक्षा, सञ्चार जस्ता क्षेत्रका नागरिकलाई प्राथमिकतामा राखेर खोप लगाउने विषयमा सरकारलाई संवेदनशील बन्न पनि अपिल गरेको छ।