काठमाडौं- इलके गुन्डोगनको दोहोरो गोलको सहयोगमा म्यानचेस्टर सिटीले सहज जित निकालेको छ।
इंग्लिस प्रिमियर लिग(ईपीएल) अन्तर्गत शनिबार राति सम्पन्न खेलमा म्यानचेस्टर सिटीले टोटेनहमविरुद्ध ३–० गोलको जित निकालेको हो।
सिटीको जितका लागि रोड्रीले खेलको २३ औं मिनेटमै अग्रता दिलाएका थिए। पेनाल्टीमा पाएको अवसरको सदुपयोग गर्दै रोड्रीले गोल गरे।
यससँगै पहिलो हाफमा सिटी एक गोलले अघि रह्यो। दोस्रो हाफमा गुन्डोगनले दुई गोल गरे।
खेलको ५० औं मिनेटमा रहिम स्टार्लिङले दिएको पासलाई सदुपयोग गर्दै उनले अग्रतालाई दोब्बर बनाए।
त्यस्तै, ६६ औं मिनेटमा गोलकिपर एडर्सन मोरेसको पासमा गुन्डोगनले दोस्रो गोल गरे। यससँगै सिटीले ३–० गोलको जित निकाल्यो।
गएरातिको जितसँगै ५३ अंक बनाएको सिटी शीर्षस्थानमा छ भने ३६ अंकका साथ टोटेनहम नवौं स्थानमा छ।
शनिबार रातिको अर्को खेलमा ब्राइटनले एस्टन भिल्लासँग गोलरहित बराबरी खेलेको छ। त्यस्तै बर्नलीले क्रिस्टल प्यालेसमाथि जित निकालेको छ।