काठमाडौं- नेकपा दाहाल नेपाल पक्षीय अध्यक्ष एवम् पूर्व प्रधानमन्त्री पुष्पकमल दाहालले उपलब्धिमाथि हमला भएको भन्दै त्यसको रक्षाका लागि एकै ठाउँमा उभिएर संघर्ष गर्नुपर्ने बेला आएको बताएका छन्।
जसपा संघीय परिषद्का अध्यक्ष एवम् पूर्व प्रधानमन्त्री बाबुराम भट्टराईको गुमनाम आमाहरुको कथा नामक पुस्तक लोकार्पण कार्यक्रममा बोल्दै उनले यस्तो बताएका हुन्।
‘एकचोटी मोर्चा कसेर अहिलेको परिस्थितिमा अघि बढ्नुपर्ने अवस्था आएको छ, ‘उनले भने, ‘उपलब्धिमाथि हमला भएको छ। सबै एक ठाउँमा उभिएर संघर्ष गर्नुपर्ने छ।’
संविधान पूर्ण छ भनेर आफूहरुले अहिले पनि दाबी नगरेको भन्दै संविधान परिमार्जन हुँदै जाने दस्तावेज भएको उनले बताए। संविधानको मुल मर्ममाथि प्रहार भएको उनको भनाइ छ।
आफूहरु र बाबुराम भट्टराईका बीचमा धेरै आयामहरु रहेको भन्दै पुस्तकले धेरै विषय समेटेको उनले बताए।
‘समयले गम्भीर आत्मसमीक्षा र विमर्श गर्नुपर्नेतर्फ डोर्याएको छ, ‘उनले भने, ‘अहिले बाबुराम जी र म एउटै पार्टीमा त छैनौँ। तर अहिलेको परिस्थितले एउटा मुद्दामा उभिएका छौँ।’