बुटवलमा गरिबको लगत संकलन सुुरु 

बुटवल– बुटवल उपमहानगरपालिकाले गरिब परिवार पहिचान गर्न तथ्यांक संकलन सुरु गरेको छ। 

संघीय सरकारले बनाएको गरिब परिवार पहिचान तथा परिचयपत्र वितरण निर्देशिका, २०७५ का लागि बुटवलमा तथ्यांक संकलन सुरु गरिएको हो। 

गरिब वर्गलाई वर्गीकरण गर्ने, त्यसअनुसार परिचयपत्र वितरण गर्ने र विभिन्न सीपमूलक कायक्रममार्फत उनीहरुको आर्थिक रुपान्तरणमा सहयोग पुर्याउने उद्देश्यले यो अभियान सुरु गरिएको उपमहानगरका प्रमुख शिवराज सुवेदीले जानकारी दिए।  

यथार्थ विवरणमा आधारित तथ्यांक संकलन गर्न र कुनै पनि प्रकारको कमीकमजोरी नगर्न उनले निर्देशन दिए। करिब पाँच महिनामा विवरण संकलन गरेर बुझाउने गरी गणकहरुसँग उपमहानगरले कार्य सम्झौता गरेको छ। 

तथ्यांक संकलनमा जाने गणकहरुलाई बुटवल उपमहानगरले पाँच दिने अभिमुखीकरण र विशेष अनुशिक्षण गराएर काममा खटाएको सामाजिक महाशाखा प्रमुख तुलसा अर्यालले बताइन्।

१९ वडामा २७ जना गणकहरुले वडा र टोल बाँडेर लगत संकलनको काम गरेको उपमहानगरले जनाएको छ।