चितवन– दुर्लभ एकसिङ्गे गैँडाको खाग बिक्री गरेको अभियोगमा १४ जना पक्राउ परेका छन्।
चितवन राष्ट्रिय निकुञ्जले बुधबार पत्रकार सम्मेलनमार्फत् अभियुक्तहरूलाई सार्वजनिक गरेको हो।
निकुञ्ज प्रशासन, नेपाली सेनाको बटुक दल गण, नेपाल प्रहरीको केन्द्रीय अनुसन्धान ब्यूरोले उनीहरुलाई देशका विभिन्न ठाउँबाट पक्राउ गरेको हो।
अभियोग लागेका १८ जना फरार छन्। चालू आर्थिक वर्षको ६ महिनामा चितवन राष्ट्रिय निकुञ्जमा चोरी शिकारीबाट मारिएका चार गैँडा फेला परेका थिए।
पक्राउ परेकाहरुको साथबाट एउटा गाडी, दुईटा मोटरसाइकल, पत्रिका काटेर पैसा जस्तो बनाएको २३ बण्डल र ४१ लाख बराबरको बैंक भौचर ६ थान बरामद गरिएको छ।
रासस