काठमाडौं– राष्ट्रिय महिला लिग अन्तर्गत आज (मंगलबार) सम्पन्न दोस्रो खेलमा विभागीय टिम नेपाल पुलिस क्लबले सहज जित निकालेको छ। सातदोबाटोस्थित एन्फा मैदानमा सम्पन्न खेलमा पुलिसले विराटनगरविरुद्ध ३–० गोलको जित निकालेको हो।
पुलिसको जितका लागि निरु थापाले दुई गोल गरिन् भने निर्मला उपाध्यायले एक गोल गरिन्। पहिलो हाफको ४१ औं मिनेटमा गोल गर्दै निर्मलाले सुरुआती अग्रता बनाएकी थिइन्। यससँगै पहिलो हाफमा विभागीय टिम एक गोलले अघि रह्यो।
दोस्रो हाफमा उसले दुई गोल थप्यो। यसपटक दुवै गोल निरु थापाले गरिन्। उनले ५७ औं मिनेटमा पहिलो गोल गरिन् भने त्यसको तीन मिनेटमै दोस्रो गोल गरिन्।
निरूको व्यक्तिगत दोस्रो गोलसँगै प्रहरीले ३–० गोलको अग्रता कायम गर्यो। आजको जितसँगै पुलिसले ११ अंक बनाएर तेस्रो स्थानको वालिङ नगरपालिकासँग अंक बराबरी गरेको छ।
जारी लिगमा २१ अंकका साथ एपीएफ शीर्षस्थानमा छ भने एक खेल बढ्ता खेलेर १९ अंक बनाएको त्रिभुवन आर्मी फुटबल क्लब दोस्रो स्थानमा छ।