हडतालकै बीच ओली पक्षीय नेकपाका युवा विद्यार्थीको मार्चपास

काठमाडौं– नेकपाको दाहाल–नेपाल समूहले आह्वान गरेको आमहडताल तथा आगजनीको विरोध तथा भोलि शुक्रबारको जनसभाको तयारीस्वरुप केपी ओली नेतृत्वको नेकपाका युवा विद्यार्थीले काठमाडौंमा मार्चपास सुरू गरेका छन्।

विघटित प्रतिनिधिसभाका सांसद एवम् केन्द्रीय सदस्य महेश बस्नेतको नेतृत्वमा मार्चपास सुरु भएको हो।

युवा विद्यार्थीहरुले काठमाडौंका विभिन्न स्थानबाट मार्चपास निकालेका छन्। प्रदर्शनीमार्गबाट सुरू भएको मार्चपास कान्तिपथ हुँदै सहर परिक्रमा गर्ने बताइएको छ।

दाहाल–नेपाल समूहका कार्यकर्ता हडताल सफल पार्न सडकमा भइरहेका बेला ओली समूहका युवा विद्यार्थीहरु मार्चपासमा निस्केपछि झडपको स्थिति नहोस् भन्नका लागि सुरक्षा व्यवस्था कडा पारिएको छ।