बर्दिवासमा प्रहरी र प्रदर्शनकारीबीच झडप, वडाध्यक्ष घाइते

जनकपुरधाम– नेपाल कम्युनिष्ट पार्टी (नेकपा) दाहाल–नेपाल समूहले आह्वान गरेको एकदिने आमहडतालको क्रममा महोत्तरीको बर्दिवासमा प्रहरी र प्रदर्शनकारीबीच झडप भएको छ। 

झडपमा बर्दिवास नगरपालिका वडा नम्बर ३ का वडाध्यक्ष राजन ढुंगाना घाइते भएका छन्।

पूर्व–पश्चिम राजमार्ग खुलाउन प्रहरीले बल प्रयोग गरेपछि प्रदर्शनकारी र प्रहरीबीच झडप भएको थियो। सड़क खुलाउने क्रममा सामान्य झड़पमात्रै भएको जिल्ला प्रहरी कार्यालय महोत्तरीले जनाएको छ।

प्रहरी र आन्दोलनकारीबीच भएको झडपमा नेकपा प्रदेश २ का सदस्य शंकर महतो, बर्दिवास नगरपालिका वडा नम्बर १ का वडाध्यक्ष चुडामणि पोखरेल, वडा सदस्य निरज अधिकारी, वडा नम्बर–३ का वडाध्यक्ष राजन ढुंगानालगायत घाइते भएका छन्।

उनीहरुको हात, खुट्टा र टाउकोमा चोट लागेको छ। वडा नम्बर–३ का अध्यक्ष ढुङ्गानाको टाउकोमा गम्भीर चोट लागेको छ।