कैलालीमा थप दुई वटा बोर्डर आउट पोष्ट स्थापना

धनगढी– कैलालीमा थप दुई वटा बोर्डर आउट पोष्ट स्थापना गरिएको छ। आज कैलालीको कैलारी गाउँपालिका–७, लठ्ठाघाट र टीकापुर नगरपालिका–७, कालाकुण्डामा सशस्त्र प्रहरी बल नेपालको बोर्डर आउट पोष्ट स्थापना भएको हो।

भारतसँग १०१ किलोमिटर खुला सीमानाका रहेको कैलालीमा योसँगै नेपाल बोर्डर आउट पोष्टको संख्या १४ पुगेको छ।

कैलारी गाउँपालिका वडा नम्बर ७ मा स्थापना भएको बोर्डर आउट पोष्टको गाउँपालिकाका अध्यक्ष लाजुराम चौधरी र सशस्त्र प्रहरी बल, नेपाल नम्बर ७ बैद्यनाथ बाहिनी मुख्यालय कैलालीका बाहिनीपति सशस्त्र प्रहरी नायव महानिरीक्षक प्रविणकुमार श्रेष्ठ र टीकापुर नगरपालिका वडा नम्बर ७ मा स्थापना भएको बोर्डर आउट पोष्टको वडा अध्यक्ष रामलाल डगौंराले संयुक्त रुपमा उद्घाटन गरेका हुन्।

बोर्डर आउट पोष्टको उद्घाटन गर्दै सशस्त्र प्रहरी नायव महानिरीक्षक प्रविणकुमार श्रेष्ठले राज्य र जनताको सेवा र सुरक्षा ध्यानमा राखेर अझ बढी अनुशासित एवम् कर्तव्यनिष्ट भएर सेवा गर्नुपर्ने बताए। उनले सीमा सुरक्षा, अपराध र अवैध चोरी निकासी पैठारी रोक्न व्यावसायिक ढंगले कार्य क्षेत्रमा खटिन सुरक्षाकर्मीलाई निर्देशन दिए।