काडमाडौं– नेपाल एस्ट्रोनोमिकल सोसाइटी (नासो)ले आयोजना गरेकोे ‘चौथो विज्ञानमा महिला पुरस्कार २०२०’ को नतिजा सार्वजनिक भएको छ। आयोजक नासोले आज (सोमबार) तीन विधाका पुरस्कार विजेताको नाम सार्वजनिक गरेको हो।
जसमा व्यावसायिक विधातर्फ आकृति काफ्ले बरालले पुरस्कार जितेकी छन् भने विद्यार्थी विधातर्फ रोजिना शाक्यले। विज्ञानमा महिला पुरस्कार २०२० चौथो संंस्करण हो। यो संस्करणमा परेका ५० वटा प्रस्तुतिमध्ये अन्तिम १८ लाई ६ जनाको निर्णायक टोलीले छनोट गरेको आयोजकले बताएको छ।
प्रतियोगितामा सहभागी बनेका मध्येबाट छानिएका प्रस्तुतिलाई युट्युबमा राखिएको थियो। युट्युबमा सर्वाधिक हेरिएको भिडियोलाई पब्लिक च्वाइस अवार्ड दिने आयोजकले बताएको छ। पब्लिक च्वाइस अवार्डतर्फ समीक्षा कँडेल (व्यावसायिक) र शुभेक्षा सापकोटा (विद्यार्थी) विजयी भए।
सबै विजेताहरुलाई माघ २९ मा परेको विज्ञानमा महिला पहुँचको अन्तर्राष्ट्रिय दिवसमा पुरस्कार र अवार्ड वितरण गरिने आयोजकले बताएको छ। व्यावसायिकतर्फको विजेताले २५ हजार रुपैयाँ पाउनेछ भने विद्यार्थीतर्फको विजेताले १५ हजार।