पोखरा– पोखरा महानगरपालिकाले किसानको वर्गीकरण गर्दै परिचयपत्र दिन थालेको छ।
गण्डकी प्रदेश सरकारले बनाएको किसान वर्गीकरण तथा पचियपत्रसम्बन्धी कार्यविधि र महानगरको पशु विकास अनुदानसम्बन्धी कार्यविधिअनुसार किसानलाई वर्गीकरण गरेर परिचयपत्र वितरण सुरु गरेको हो।
महानगर कृषि शाखा प्रमुख नवराज अधिकारीले पहिलो चरणमा २८८ किसानलाई परिचयपत्र वितरण गरिएको बताए।
गण्डकी प्रदेश सरकारका कृषि तथा सहकारीमन्त्री लेखबाहदुर थापा मगरले पोल्ट्री व्यवसायी तेजबहादुर भट्टराईलाई परिचयपत्र हस्तान्तरण गरेर कार्यक्रम सुरु गरेका हुन्।
मन्त्री थापा मगरले परिचयपत्र वितरण किसानका लागि गौरवको विषय भएको बताए। उनले भने, ‘परिचयपत्र वितरण किसानको पहिचानको हो । त्यसैले यो कार्यक्रम महत्त्वपूर्ण छ।’
उनले राज्यले प्रदान गर्ने अनुदान र निर्माण गर्ने नीति नियम निर्माण समेत सहज हुने विश्वास व्यक्त गरे।
कृषक पेन्सन अनिर्वाय हुने अवस्थामा परिचयपत्रको महत्त्व अझ बढ्ने बताउँदै उनले भने, ‘राज्यबाट प्राप्त गर्ने सेवासुविधा प्राप्त गर्न र कृषकको पहिचानका लागि महत्त्व राख्छ।’
उनले प्रदेशले किसान वर्गीकरणका पाँच आधार तयार गरेको र त्यही आधारमा महानगरले परिचयपत्र वितरण गरेको बताए।
प्रदेश सरकारले भूमिहीन, दैनिक ज्यालादारी, मध्यम, उद्यमी र ठूला किसान गरी पाँच आधार तय गरेको छ।
उनले कृषक परिचयपत्रको सुरुआत पोखराबाट भए पनि यसलाई देशव्यापी बनाउनुपर्नेमा जोड दिए।
पोखरा महानगरपालिकाका प्रमुख मानबहादुर जीसीले किसानले उत्पादन गरेका वस्तुका लागि बजारीकरण गर्ने जिम्मा लिने बताउँदै उत्पादनमा ध्यान दिन किसानलाई आग्रह गरे।
प्रमुख जीसीले अहिले कृषिको अनुदान सरकारको नेतृत्वकर्ता दलका कार्यकर्ता र हुनेखानेले लगेको बताउँदै कृषक परिचयपत्रले अनुदान वितरणमा समेत सहजता ल्याउने विश्वास व्यक्त गरे।
पोल्ट्री व्यवसायी तेजबहादुर भटराईले परिचत्रयपत्र वितरणले किसानलाई सहज हुने बताए।
राष्ट्रिय पशु प्रवर्धन केन्द्र पोखराका प्रमुख नारायण शर्माले परिचयपत्र वितरणलाई देशव्यापी रुपमा लागू गर्नुपर्नेमा जोड दिए।
पोखरा महानगर कृषि महाशाखा प्रमुख मनहर कडरियाले परिचयपत्र वितरणले राज्यका सेवासुविधाको ग्यारेन्टी गरेको बताए।