काठमाडौं- नेकपाको दाहाल-नेपाल समूहका अध्यक्ष पुष्पकमल दाहालले आफ्नो र माधव नेपालको सम्बन्ध निकै पुरानो भएको बताएका छन्।
धनगढीमा आयोजित पार्टीको विशाल सभालाई सम्बोधन गर्दै दाहालले आफ्नो र माधव नेपालको सम्बन्ध ४० को दशकदेखिकै रहेको बताए।
उनले भने, ‘तपाईँहरुलाई यीनीहरुको भर्खरै चिनजान भएको हो भन्ने लागेको होला, हामीले ४० को दशकदेखि नै सहकार्य गर्दै आएका हौँ।’
दाहालले माओवादी सशस्त्र युद्धकालमासमेत नेता नेपालसँग सहकार्य भएको खुलासा गरे।
‘हामी युद्धमा हुँदा पनि कमरेड माधव नेपालजीसँग पटकपटक छलफल भएको थियो। त्यो समयमा सबैभन्दा धेरै भेट र छलफल गर्ने हामी नै थियौँ।’ दाहालले भने, हामीले युद्धलाई शान्तिपूर्ण रुपमा अन्त्य गर्ने सम्बन्धमा धेरै पटक छलफल गरेका छौँ।
उनले अगाडि थपे, ‘मैले सशस्त्र युद्धको नेतृत्व गर्दा माधवजीले शान्तिपूर्ण आन्दोलनको नेतृत्व गरिरहनु भएको थियो। यसरी हाम्रो लामो सहकार्यका कारण हामीले शान्ति सम्झौता गर्यौँ। दिल्ली सम्झौता भयो। देशमा गणतन्त्र आयो। त्यसैले हामीले लामो समयदेखि सहकार्य गरिरहेका छौँ, भर्खरैको चिनजान होइन।’