धनगढी- कैलालीमा लागुऔषधको रुपमा प्रयोग हुँदै आएको प्रतिबन्धित औषधिसहित हेल्थ क्लिनिकका सञ्चालक पक्राउ परेका छन्।
पक्राउ पर्नेमा जिल्लाको लम्कीचुहा नगरपालिका–५, चौरीस्थित हेल्थ क्लिनिकका सञ्चालक २७ वर्षीय करिश ढकाल रहेको प्रहरीले जनाएको छ।
प्रतिबन्धित औषधि बिक्रि भइरहेको भन्ने सूचनाको आधारमा ईलाका प्रहरी कार्यालय लम्कीबाट खटिएको प्रहरी टोलीले उनलाई पक्राउ गरेको हो।
प्रहरीले उनको क्लिनिकबाट ५२ पत्ता ट्रामाडोल, ४६ पत्ता आइपी एभिल–५० बरामद गरेको जिल्ला प्रहरी कार्यालय कैलालीका प्रवक्ता प्रहरी नायव उपरीक्षक प्रतीक बिष्टले बताए।
उनीविरुद्ध लागुऔषध शीर्षकमा मुद्दा दर्ता गरी म्याद थप भइसकेको र अनुसन्धान जारी रहेको विष्टले बताए।