जनकपुरधाम– प्रदेश २ मा कोरोना खोप अभियानको पहिलो दिन बुधबार ७३३ जनाले खोप लगाएका छन्।
८ जिल्लाका ९ केन्द्र र १४ वुथबाट ७३३ जनाले कोरोनाविरुद्धको खोप लगाएको स्वास्थ्य निर्देशनालय प्रदेश २ का निमित्त निर्देशक विजय कुमार झाले जानकारी दिए।
अभियानको पहिलो दिन आठ जिल्ला अस्पताल र सप्तरीमा रहेको प्रहरी अस्पतालमा कोरोना विरुद्धको खोप दिइएको छ। पहिलो चरणमा अग्रपंक्तिमा खटेका स्वास्थ्यकर्मी, सरसफाइकर्मी, सुरक्षाकर्मीलाई खोप लगाइएको छ।
अभियानको पहिलो दिन सबैभन्दा बढी सप्तरीमा १४६ जनाले खोप लगाएका छन् भने सबैभन्दा कम रौतहटमा २६ जनाले।
सप्तरीमा गजेन्द्र नारायण सिंह अस्पतालमा ७६ जना र रुपणी प्रहरी अस्पतालमा ७० जनाले खोप लगाएका छन्। यस्तै सर्लाहीमा १२९ जना, पर्सामा ११३, सिरहामा ११०, धनुषामा १०२, बारामा ७० र महोत्तरीमा ३७ जनाले खोप लगाएको झाले बताए।
पहिलो खोप भने प्रदेशका आन्तरिक मामिला तथा कानुनमन्त्री ज्ञानेन्द्र यादवले लगाएका थिए।