उखु किसानको बक्यौता रकम शीघ्र भुक्तानी गर्न आयोगको आग्रह

काठमाडौं– राष्ट्रिय मानव अधिकार आयोगले उखु किसानहरूको बक्यौता रकम शीघ्र भुक्तानी गर्न सरकारसँग माग गरेको छ।

विरोध प्रदर्शनको क्रममा काठमाडौंमा गत पुस १४ गते मृत्यु भएका नारायण राय यादवको परिवारले पनि भुक्तानी नपाएको अनुगमनबाट जानकारी भएको आयोगले जनाएको छ।

आयोगले बुधबार जारी गरेको विज्ञप्तिमा उल्लेख छ, ‘राष्ट्रिय मानव अधिकार आयोगले तराई मधेसका उखु किसानहरूको श्रम तथा सम्पत्तिको अधिकार, निजहरूले लामो समयदेखि गरिरहेको माग तथा संघर्षका कार्यक्रमलाई नजिकबाट अनुगमन गरिरहेको छ।’ 

सरकार र उखु किसान संघर्ष समितिबीच पुस १३ गते भएको सम्झौतामा २१ दिनभित्र भुक्तानी दिने भनिए पनि किसानहरुले आंशिक रकम मात्र पाएको आयोगको विज्ञप्तिमा उल्लेख छ।

आयोगले सम्झौता कार्यान्वयन अवस्थाबारे धनुषा, सर्लाही, महोत्तरी जिल्लाको स्थलगत अनुगमन गरेको थियो। 

आयोगले भनेको छ, ‘मृतक नारायण राय यादवको परिवार तथा अन्य किसानले अझै पाउन बाँकी रहेको सम्पूर्ण रकम सम्झौताअनुरुप शीघ्र उपलब्ध गराउन तथा त्यसरी बक्यौता रकम उपलब्ध नगराउने उद्योगीलाई कानुनी कारबहीको दायरामा ल्याउन सरकारको पुनः ध्यानाकर्षण गराउँछौं।