काठमाडौं- प्रतिनिधिसभा विघटनविरुद्ध रिट निवेदक सन्तोष भण्डारीले प्रधानमन्त्रीले संसद्को विघटन मात्रै नभई संविधानकै विघटन गरेको बताएका छन्।
संवैधानिक इजलासमा आज सुरु भएको सुनुवाइको सुरुआतमा बहस गर्दै उनले यस्तो जिकिर गरेका हुन्।
उनले प्रधानमन्त्रीलाई ससद् विघटन गर्न पाउने कुनै अधिकार नै नभएको बताए। केपी शर्मा ओली संविधानको धारा ७६ (२) बमोजिम प्रधानमन्त्री बनेको भन्दै भण्डारीले कुनै विशेषाधिकारसमेत नभएको बताए।
जबर्जस्ती संविधानमा अधिकार रहेको भन्दै प्रधानमन्त्री ओलीले गरेको संसद् विघटनको कदम संवैधानिक नरहेको उनको भनाइ छ।
उनले राष्ट्रपतिले पनि छलफल नै नगरेर तत्काल सिफारिस कार्यान्वयन गरेर सदर गरेको बताए। प्रधानमन्त्रीले जुन बेला लाग्यो त्यो बेला संसद् विघटन गर्न नपाउने भन्दै उनले नेपालको संविधान २०७२ मा त्यस्ताे कुनै व्यवस्था नभएको बताए।
प्रतिनिधिसभा विघटन गरेर चुनावका नाममा देशलाई भड्खालोमा हाल्न खोजेको उनको भनाइ छ।