विराटनगर- नेकपाको दाहाल–नेपाल समूहका नेता सुरेन्द्र पाण्डेले प्रधानमन्त्री केपी शर्मा ओलीले लोकतन्त्रमाथि प्रहार गरेको आरोप लगाएका छन्।
शनिबार मोरङको बेलबारीमा अनेमसंघ मोरङको अगुवा कार्यकर्ता भेलामा नेता पाण्डेले पहिला देशमा लोकतन्त्र ल्याउनु पर्छ भन्दा बयल गाढा चढेर अमेरिका पुगिँदैन भन्नेले लोकतन्त्रलाई नै धरापमा पार्ने काम गरेको बताए।
लोकतन्त्रलाई थाम्न सबै एकजुट हुने बेला आएको उनले बताए। संविधानले दिँदै नदिएको अधिकार प्रयोग गरेर संसद विघटन गरेको भन्दै उनले संसद पुनस्र्थापना भएरै छाड्ने दाबी गरे।
प्रधानमन्त्री ओलीले अदालतमा पेश गरेको फाईल चोरी गरेकोसमेत उनले आरोप लगाए।
ओलीको प्रवृत्तिले प्रतिक्रियावादीहरु सलबलाउन थालेको पाण्डेको आरोप छ। उनले भने, ‘ओली ओरालो यात्रामा रहेकाले केही दिनमा यात्रा सकिन्छ।’ पार्टीको बहुमत सदस्य आफूहरुसँग भएकाले नेकपा र सूर्य चिन्ह आफूहरुसँगै रहने उनको दाबी छ।