प्रधानमन्त्री ओलीले भने- मलाई हँसाएर हिँड्यो भन्ने आरोप लगाएका छन् के म मान्छे मार्दै हिँडु त ?

काठमाडौं। प्रधानमन्त्री केपी शर्मा ओलीले आफू सबैको अनुहारमा मुस्कान ल्याउन चाहेको बताएका छन्। 

काठमाडौंमा आज आयोजित प्रदेश १ को प्रदेशस्तरीय कार्यकर्ता भेलामा ओलीले आफूले देशलाई बर्बाद हुन नदिएको बताएका हुन्। 

‘मलाई हँसाएर हिँडेको भनेर आरोप लगाएका छन्,’ उनले भने, ‘के अब म मानिस मार्दै हिँडु त ? बिधुवा अनि बालबालिकालाई टुहुरा बनाएर हिँडुँ त?’

दाहाल–नेपाल समूहलाई लक्षित गर्दै उनले भने, ‘तिमीहरूले रुवाउन खोजेका थियौ, मैले रुवाउन दिएन।’

ओली समूहका अध्यक्षसमेत रहेका उनले मुलुक अगाडि बढिसकेको र पछाडि नफर्कने बताए। 

‘अँध्यारो हुँदा पनि केपी ओली मुस्कुराइरहेको सोच्नु भएको होला,’ उनले भने, ‘उहाँहरू त देश बर्बाद पार्न नपाएर चिन्तामा हुनुहुन्छ।’

यस्तै उनले आगामी निर्वाचनबाट नै जनताले सही र गलतको फैसला गर्ने बताएका छन्। निर्वाचन नचाहनेहरू डराइरहेको उनको भनाइ छ।

‘अहिले निर्वाचनमा जाँदा देश संकटमा पर्‍यो भनिरहेका छन्,’ उनले भने, ‘यिनीहरूको योजना त सत्ता कब्जा गर्ने सोच रहेछ, अदालतले स्वतन्त्ररूपले फैसला गर्न पाउनुपर्छ।’