काठमाडौं– नेपालमा डिजेल आयात गर्ने पेट्रोलियम पाइपलाइन फुटाएर डिजेल चोरी भएको घटनाका सम्बन्धमा नेपाल आयल निगमले प्रष्टीकरण दिएको छ।
निगमले पेट्रोलियम पाइपलाइन फुटाएर डिजेल चोरी भएको सम्बन्धमा शुक्रबार विज्ञप्ति निकालेरै नेपालतर्फ कुनै क्षति नभएको स्पष्ट पारेको हो।
‘पाइपलाइन फुटाएर तेल चोरी भएको घटा नेपाल–भारत नाका अन्तरदेशीय पाइपलाइनको मिटर रहेको स्थानबाट करिब १ सय किलोमिटर भारततर्फ रहेकोले घटनाबाट नेपाल आयल निगमलाई कुनै क्षति नभएको’ विज्ञप्तिमा उल्लेख छ।
त्यस्तै निगमले हाल पेट्रोलियम पाइपलाइनमार्फत नियमित रुपमा तेल आयात भइरहेको समेत विज्ञप्तिमा उल्लेख गरेको छ। भारतको पटना नजिकै पाइपलाइन फुटाएर तेल चोरीको घटना भएको थियो। सो विषयमा निगमका पाइपलाइन प्रोजेक्ट म्यानेजर भरत रेग्मीले नेपालतर्फ कुनै क्षति नभएको र पाइपलाइनमार्फत नियमित आयात भइरहेको जानकारी दिएका थिए।