काठमाडौं- त्रिभुवन विश्वविद्यालयको मैदानमा जारी प्रधानमन्त्री कप पुरुष एक दिवसीय क्रिकेटको उद्घाटन खेलमा नेपाल आर्मी क्लबले गण्डकी प्रदेशविरुद्ध कठिन लक्ष्य प्रस्तुत गरेको छ।
गण्डकीले २८८ रनको लक्ष्य पाएको हो।
टस जितेर ब्याटिङ रोजेको आर्मीले पूरा ओभर खेल्दै ५ विकेटको क्षतिमा २८७ रन बनायो।
कप्तान विनोद भण्डारीको १११ रनको शतकीय सहयोगमा आर्मीले २८७ रन बनाउन सफल भएको हो।
७६ बलमा सो रन बनाएका भण्डारीले ९ चौका र ५ छक्का प्रहार गरे।
त्यस्तै राष्ट्रिय टिमका राजु रिजाल अर्धशतक बनाउन पाँच रनले चुक्दा रोहित पौडल १० रनमै आउट भए। ओपनर हरिकृष्ण झा भने ४८ बलमा १४ रन बनाउँदै पेवेलियन फर्किए।
मध्यक्रममा आएका राजेश पुलामीले ३८ रन प्रहार गरे भने लोकेश बमले ४२ रन बनाएर अन्तिम बलमा बिदा भए।
यता गण्डकीका लागि विपिन कार्कीले र
विशाल पौडेलले समान २–२ विकेट लिए भने दीपेश खत्रीले एक विकेट लिए।