मुख्यमन्त्री स्वच्छता अभियान : फर्जी कागजात पेश गर्ने ठेकेदारलाई कारबाही भएन, ठेक्का प्रक्रियामा चलखेल

जनकपुरधाम– प्रदेश २ सरकारले सञ्चालन गरेको ‘मुख्यमन्त्री स्वच्छता अभियान’मा ठूलो रकम चलखेल भएको खुलेको छ। महोत्तरीको पिपरा गाउँपालिका बनौलीमा रहेको ऐतिहासिक लक्ष्मीसागर पोखरी सौन्दर्यीकरणका लागि ठेक्का प्रक्रियामा रकमको चलखेल भएको पाइएको हो।

प्रदेश २ को मुख्यमन्त्री तथा मन्त्रिपरिषद् कार्यालयअन्तर्गत चलाइएको मुख्यमन्त्री स्वच्छता अभियानअन्तर्गत मैथिली भाषाका महाकवि विद्यापतिसँग सम्बन्धित लक्ष्मीसागर पोखरीको सौन्दर्यीकरण कार्य अगाडि बढाइएको छ। तर, यसका लागि भएको ठेक्का प्रक्रियामा अभियानका संयोजक भगवान झाले आफूखुसी रकमको चलखेल गरी प्रक्रिया अगाडि बढाएको आरोप सरोकारवालाले लगाएका छन्।

लक्ष्मीसागर पोखरीको ठेक्का प्रक्रियामा यसअघि न्यूनतम रकम कबुल गरेको निर्माण कम्पनी विकास एण्ड ब्रदर्सलाई सौन्दर्यीकरणको जिम्मा दिइएको थियो। तर पछि सो कम्पनीले फर्जी कागजात पेश गरेको पाइएपछि दोस्रो नम्बरमा रहेको इजी इन्फ्रालाई सौन्दर्यीकरणको जिम्मा दिइएको छ। 

विकास एण्ड ब्रदर्शले वीरगन्जस्थित विद्यालय ज्ञानदा एकेडमीको भवन आफूले बनाएको भन्दै सो विद्यालयको फर्जी लेटरप्याड प्रयोग गरेर ठेक्का हात पारेको थियो। पछि विद्यालयले अभियानका संयोजक भगवान झालाई विकास एण्ड ब्रदर्सले आफ्नो फर्जी लेटरप्याड प्रयोग गरेको भन्दै पत्र पठाएको छ। पत्रमा भनिएको छ, ‘सो कम्पनीले हाम्रो कुनै भवन निर्माण गरेको छैन।

सो कम्पनीलाई अनुभवको कुनै पत्र नलेखेको स्पष्ट पार्न चाहन्छौं’
विकास एण्ड ब्रदर्शले सो विद्यालयको फर्जी लेटरप्याड प्रयोग गर्दै ०७७ असार २६ गते मुख्यमन्त्री स्वच्छता अभियानको कार्यालयमा अनुभवको पत्र पेश गरेको थियो। नक्कली कागजात प्रस्तुत गरे पनि विकास एण्ड ब्रदर्सलाई कारबाही गर्ने प्रक्रिया अगाडि नबढाइएपछि स्थानीय आक्रोशित भएका छन्। 

यता अभियानका संयोजक भगवान झाले नक्कली कागजात पेश गरेको विकास एण्ड ब्रदर्सको ३४ लाख रुपैयाँ धरौटी रकम जफत गरिसकिएको र कारबाही प्रक्रिया अगाडि बढाइएको जानकारी दिए। यद्यपि कारबाही प्रक्रिया कहाँ पुग्यो भन्ने विषयमा केही खुलाउन चाहेनन्।

नक्कली कागजात पेश गर्ने ठेकेदार कम्पनीको धरौटी रकम जफत गर्नुका साथै कालोसूचीमा राख्नुपर्ने कानुनी प्रावधान छ। तर सो कम्पनीलाई रकम लिएर उन्मुक्ति दिनुका साथै अर्को कम्पनीसँग पनि रकम लिएर सौन्दर्यीकरणको जिम्मा दिइएको स्रोत बताउँछ।

यता मुख्यमन्त्री कार्यालयका सचिव यमलाल भुषालले बनौलीस्थित लक्ष्मीसागर पोखरीको सौन्दर्यीकरण ठेक्का प्रक्रियाको विषयमा आफूलाई केही जानकारी नभएको बताएका छन्। दोस्रो कम्पनीलाई सौन्दर्यीकरणको जिम्मा दिइएको कुरासमेत आफ्नो जानकारीमा नरहेको उनको भनाइ थियो। 

सौन्दर्यीकरणको जिम्मा पाएको. कम्पनी इजी इन्फ्राका सुशील झा पनि यस विषयमा बोल्न चाहेनन्। 

मुख्यमन्त्री स्वच्छता अभियानको कार्यालयले ०७७ भदौ ३ गते महोत्तरीको पिपरा गाउँपालिका बनौलीस्थित लक्ष्मीसागर पोखरी, महोत्तरीको रौजा मजार, धनुषाको जनकपुरधाम–१७ कनकपट्टीस्थित सुब्बाजी पोखरी र महोत्तरीको मनरा सिस्वा–१० को मधवा पोखरीको सौन्दर्यीकरणका लागि बोलपत्र आह्वान गरेको थियो। 

इजी इन्फ्रा प्रालि काठमाडौंले लक्ष्मीसागर पोखरीको सौन्दर्यीकरणका लागि ८ करोड ८४ लाख ५४ हजार र रौजा मजारको सौन्दर्यीकरणका लागि ७ करोड ८५ लाख १९ हजार रुपैयाँ न्यूनतम रकम कबुल गरेको थियो।