हुम्ला। हिमपातपछि हुम्लामा चिसो बढेको छ।
हुम्ला उच्च हिमाली जिल्ला भएकाले भारी हिमपातपछि सदरमुकाम सिमकोटसहित उत्तरी नाम्खा गाउँपालिका क्षेत्रमा चिसो बढेको हाे।
आइतबार अपराह्नदेखि सिमकोटलगायत जिल्लाका उच्च क्षेत्रमा हिमपात भएको र बेँसीमा वर्षा भएसँगै चिसोले जनजीवन कष्टकर बनेको छ।
हिउँदयाम सुरु भएसँगै हुम्लाका सबै क्षेत्रमा अत्यधिक चिसो हुने गर्छ।
यहाँका नागरिक चिसो छल्न आगो ताप्ने गर्छन्। मौसम परिवर्तनसँगै आइतबारदेखि निकै चिसो बढेपछि सिमकोटको तापक्रम माइनसमा झरेको छ। हुम्लाको तापक्रम माइनस ८ डिग्री सेन्टिग्रेडमा झरेको छ।
सडकमा हिउँ जमेपछि सिमकोट आसपास चल्ने आन्तरिक सडक अवरुद्ध भएको छ।
चिसो बढेसँगै दैनिकरूपमा कार्य गर्दै आइरहेको काम पनि ठप्प भएका छन्। गाई बाख्रा मेलापातमा पनि समस्या भएको स्थानीयवासी कमल भण्डारीले बताए।
सदरमुकाम सिमकोट आसपासका क्षेत्र बाक्लो हिउँले ढाकिएको छ। स्थानीयवासीलाई आउजाउ गर्नै समस्या भएको छ।
उत्तरी हुम्लाका प्राय बस्तीका बासिन्दाले यसअघि नै गाउँ छोडिसकेका छन्। हिमपात भएपछि सदरमुकाम सिमकोट वरिपरिका रुख र जमिन सेताम्मे बनेका छन्।
आज बिहानदेखि सिमकोटमा चिसोसँगै हावाहुरी चलिरहेको छ। अहिले बाक्लो बादल लागेर अझै हिमपात हुने सम्भावना देखिन्छ।