काठमाडौं- फरवार्डद्वय सन ह्युङ मिन र ह्यारी केनको मुख्य भूमिकामा टोटेनहमले साहज जित निकालेको छ।
इंग्लिस प्रिमियर लिग (ईपीएल) को शनिबार साँझ सम्पन्न खेलमा घरेलु टिम टोटेनहमले लिड्स युनाइटेडविरुद्ध ३-० गोलको जित निकालेको हो।
जितका क्रममा सनले एक गोलसहित एक एसिस्ट गरे भने केनले पनि समान गोल र एसिस्ट गरे।
खेलको २९ औं मिनेटमा पेनाल्टीमा पाएको अवसरको सदुपयोग गर्दै केनले सुरुवाती अग्रता बनाएका थिए। अग्रता बनाएसँगै उनले टोटेनहमका लागि २०५ औं गोल गरे।
केनले गोलका अलावा ४३ औं मिनेटमा मिनको गोलका लागि पास उपलब्ध गराएका थिए। पहिलो हाफमा दुई गोलका अग्रता बनाउने क्रममा सनले टाटेनहमबाट सय गोल पुरा गरे।
पहिलो हाफमा दुई गोलले अघि रहेको घरेलु टिमले दोस्रो हाफमा पनि एक गोल थप्यो। यसपटक सनको पासमा टोबे अल्डेवेरल्डले गोल गरे। अल्डेवेरल्डको गोलसँगै टोटेनहमले ३–० गोलको सहज जित निकाल्यो।
जितको सहज अवस्थामा पुगेको टोटेनहमले खेलको इन्ज्युरी समयमा एक डिफेन्डर गुमायो। म्याट डोहर्टीले अतिरिक्त समयमा डबल यल्लो कार्ड खाँदै बाहिरिएपछि घरेलु टिमको विजय सुखद रहन सकेन्।
उपाधि दाबेदार टोटेनहमले जारी सिजनमा आठौं जित निकाल्दै तालिकाको तेस्रो स्थानमा उक्लिएको छ।