काठमाडौं– इंग्लिस प्रिमियर लिग(ईपीएल) अन्तर्गत सोमबार राति सम्पन्न खेलमा चेल्सी एस्टोन भिल्लासँग बराबरीमा रोकिएको छ।
चेल्सीको मैदान, स्ट्याम्फर्ड ब्रिजमा सम्पन्न खेलमा घरेलु टिमले स्टोन भिल्लासँग १–१ गोलको बराबरी खेलेको हो।
चेल्सीले बनाएको सुरुआती अग्रतालाई भिल्लाले तोडेपछि खेल बराबरीमा रोकियो। फरवार्ड ओलिभिए जिरुले ३४ औं मिनेटमा गोल गर्दै चेल्सीलाई अग्रता दिलाएका थिए।
जिरुको गोलसँगै पहिलो हाफमा चेल्सी एक गोलले अघि रहे पनि दोस्रो हाफको ५० औं मिनेटमा भिल्लाका अन्वर एल घाजीले गोल गर्दै खेललाई बराबरी बनाए।
बराबरीसँगै चेल्सी अंकतालिकाको छैटौं स्थानमा छ भने एस्टोन भिल्ला पाँचौ स्थानमा छ। दुवै टिमको समान २६ अंक छ।
त्यस्तै, गएराति सम्पन्न अर्को खेलमा लेस्टर सिटी र क्रिस्टल प्याललेसले पनि १–१ गोलको बराबरी खेलेका छन्।
पाहुना टिमका आईहेन्चोले १९ औं मिनेटमा पाएको पेनाल्टीको अवसर सदुपयोग गर्न नसेपछि लेस्टर अग्रता बनाउनबाट चुकेको थियो।
यसकारण पहिलो हाफमा गोलरहित बराबरी भए पनि दोस्रो हाफमा दुवै टिमले १–१ गोल गरे।
क्रिस्टलका विलफ्रेड जाहाले ५८ औं मिनेटमा अग्रता बनाए भने लेस्टरका हाव्री बर्नेसले ८३ औं मिनेटमा अग्रता तोडे।
बराबरीसँगै २९ अंक बनाएको लेस्टर अंकतालिकाको दोस्रो स्थानमा कायम छ। क्रिस्टल १९ अंकका साथ १३ औं स्थानमा छ।