काठमाडौं- चिकित्सा सुधार अभियान्ता डा. गोविन्द केसीले प्रधानमन्त्री केपी ओलीले गरेको संसद् विघटनको प्रयासप्रति आपत्ति प्रकट गरेका छन्।
आइतबार विज्ञप्ति जारी गर्दै डा. केसीले प्रधानमन्त्री ओलीले व्यक्तिगत स्वार्थको लागि संविधानको प्रयोग गरेकाले संविधानको समेत अस्तित्व सकिने बताएका छन्।
मुलुक, प्रधानमन्त्री केपी शर्मा ओली र राष्ट्रपति विद्या भण्डारीको निजी सम्पति नभएको भन्दै डा. केसीले राजा ज्ञानेन्द्रलाई नागरिकले जसरी थान्को लगाए त्यो बिर्सन नहुने उल्लेख गरेका छन्।
जारी विज्ञप्तीमा भनिएको छ, ‘नेताहरुको चोंचोमोंचो र गठजोडले गणतन्त्र स्थापना भएको हैन, त्यसैले यो संविधानलाई आफ्नो स्वार्थको फुटबल बनाउनेहरूलाई कुनै पनि हालतमा त्यस्तो कुकर्मका लागि दण्डित गर्नु पनि हाम्रो नागरिक कर्तव्य हुन्छ,।’
संविधानमा हुँदै नभएको अधिकार प्रयोग गरेर चालिएका यस्ता कदमलाई न्यायालयले सच्याइदिने अपेक्षा डा. केसीको छ।
हाल देशको न्यायालय पनि अग्निपरीक्षामा छ, न्यायालयले जस्तो फैसला गरे पनि सत्ताको उन्मादमा रहेका व्यक्तिहरुको प्रहारबाट विधिको शासन र संविधानलाई जोगाउने जिम्मेवारी हामी नागरिकसामू सदा रहने नै छ,’ डा. केसीले भनेका छन्।
उनले संविधान र विधिको शासनलाई निःशर्त स्थापित गर्नसके मात्रै सबैको कल्याण हुने बताएका छन्।