मोरङ- प्रदेश नम्बर १ का तीन जना मन्त्रीले पदबाट राजीनामा दिएका छन् ।
सत्तारुढ नेकपा विभाजित भएसँगै पुष्पकमल दाहाल र माधवकुमार नेपाल पक्षधर तीन मन्त्रीले आइतबार बिहान राजीनामा दिएका हुन् ।
सामाजिक विकासमन्त्री जीवन घिमिरे, सामाजिक विकास राज्यमन्त्री जसमाया गजमेर र उद्योग, पर्यटन, वन तथा वातावरण राज्यमन्त्री विजय विश्वासले राजीनामा दिएको मन्त्री घिमिरेका स्वकीय सचिव तिलकबहादुर बस्नेतले जानकारी दिए ।
यस्तै प्रदेश १ का मुख्यमन्त्री शेरधन राईविरुद्ध दाहाल नेपाल पक्षका सांसद्हरुले आजै अविश्वासको प्रस्ताव गर्दा गर्ने तयारी गरेका छन् । अविश्वास प्रस्ताव दर्ता गराउन दाहाल–नेपाल पक्षधर प्रदेशसभा सदस्यहरु विराटनगरमा भेला हुन थालेका छन् ।
हिजो (शनिबार) मुख्यमन्त्री राईले दाहाल–नेपाल पक्षधर आर्थिक मामिला तथा योजना मन्त्री इन्द्रबहादुर आङबोलाई बर्खास्त गरेका थिए । सामुहिक राजीनामा तयारी भइरहदा मुख्यमन्त्री आफैले बर्खास्त गरेर अविश्वासको प्रस्ताव पेश गर्न बाटो सहज बनाइदिएको बर्खास्तीमा परेका मन्त्री आङबोले बताएका छन् ।
मुख्यमन्त्री राई नेतृत्वको सरकार प्रदेशसभामा अल्पमतमा परेको छ । ९३ सदस्यीय प्रदेशसभामा सरकार सञ्चालन वा नयाँ गठनका लागि ४७ जना प्रदेशसभा सदस्य आवश्यक पर्छ ।
राईको पक्षमा २२ जनामात्रै रहेको दाहाल नेपाल समुहको दाबी छ । नेकपाका ६७ सांसद्मध्ये दाहाल–नेपाल पक्षका ४२ र ओली पक्षका २२ जना देखिएका छन् ।
प्रदेशसभामा रहेका ९३ सदस्यमध्ये नेकपाका ६७, कांग्रेसका २१, जनता समाजवादी पार्टीका ३, राष्ट्रिय प्रजातन्त्र पार्टी र संघीय लोकतान्त्रिक राष्ट्रिय मञ्चका १÷१ जना छन् । नेकपाका ६७ सदस्यमध्ये पूर्व एमालेका ५१ र पूर्वमाओवादीका १६ जना छन् ।