हल सञ्चालकलाई डाक्यो सीडीओ कार्यालयले 

काठमाडौं- आज (शुक्रबार) देखि सिनेमा हलहरु खोल्ने तयारी गरेका हल सञ्चालकलाई जिल्ला प्रशासन कार्यालय काठमाडौंले छलफलका लागि डाकेको छ। 

कोरोनाको महामारी अझै पनि कायमै रहेको अवस्थामा हल खोल्न लागेपछि सञ्चालकलाई छलफलका लागि जिल्ला प्रशासन कार्यालयले बिहान ११ बजेका लागि डाकेको हो । 

हिजो (बिहीबार) सीसीएमसीले सिनेमा हल सञ्चालकसँग छलफल गरेको थियो। छलफलमा हल खोल्नका लागि नहतारिन सीसीएमसीले सुझाव दिएको थियो। तर, सञ्चालकले सुरक्षाका सबै उपाय अपनाएर हल खोल्न लागिएका बताएका थिए। 

कोरोनाको महामारीका कारण नौ महिनादेखि नेपालका हल बन्द छन्। आजदेखि सञ्चालकहरु र चलचित्रकर्मी आफैंले हल खोल्न लागेका छन्। 

अब पछि नहट्ने हल सञ्चालकहरुको भनाइ छ। सीडीओ कार्यालयमा हुने छलफल सकारात्मक हुने र हल खोल्न सहज वातावरण बन्ने उनीहरुको अपेक्षा छ।